Materialije

kopěrowanska předłoha

nowinske strony

barbojta papjera

lěpk

materialije k wudebjenju kłobuka

wóskowa kryda abo barbjenčki

Přihot

Jednotliwe fałdowanske kroki přihotować a fałdowanski muster we wotpowědnym slědźe jako fałdowansku dróhu na dołhu ławku wupołožić. Papjerjany kłobuk jako muster k wobhladanju spaslić a wudebić.

Přispomnjenje

Zwjetša njeje za dźěći lochko, runočasnje z Wami krok po kroku fałdować, dokelž dźěłowy nawod njerozumja. Dźěćom pomha, jeli fałdowanski muster we wotpowědnym slědźe jako fałdowanska dróha wuleži. Tak móža kóždy čas sami přepruwować, hač prawje fałduja abo kak přichodny fałdowanski krok wupada.

Přewjedźenje

Majka a Flori chcetaj sej dźensa wulećeć, dokelž so wonka tak rjenje słónco směje. Majka ma wjele kłobukow w swojim kamorje. Wozmu dźensa tón módry z tej šěrokej kromu., wona praji. Flori powěda: Ja sfałduju sej spěšnje papjerjany kłobuk. Jedyn z třomi róžkami a wulkim pjerjom, kotrež sym wonka w zahrodźe namakał. Hdyž sej swój kłobuk na hłowu staju, přińdu mje pisane mjetelčki wopytać. Pokazaće wudebjeny papjerjany kłobuk a rozjasniće dźěćom, zo sej dźensa kóžde dźěćo tajki kłobuk z třomi róžkami spasli.

Sej fałdowansku dróhu wobhladać

Wobhladajće sej najprjedy z dźěćimi fałdowansku dróhu. Tu je papjerjany kłobuk hižo sfałdowany a móžeće sej kóždy krok dokładnje wobhladać.

Fałdowanske kroki pokazać

Potom pokazaće dźěćom krok po kroku, kak kłobuk fałdujeće. Najprjedy sfałduju łopjeno wot horjeka dele runje na połojcu a wostanu je začinjene. Nětko zjědu wotlěwa naprawo jónu z porstom po sfałdowanej kromje. Potom sfałduju łopjeno wotlěwa naprawo hišće raz na połojcu a wočinju je zaso. Srjedźa je nětko moja srjedźna linija. Jako přichodne sfałduju lěwy horni róžk nutř na tutu srjedźnu liniju a zjědu po kromje z porstom. Po tym sfałduju prawy horni róžk nutř na tutu srjedźnu liniju a zjědu po kromje z porstom. Potom zazhibnu delnju kromu za kłobukowu kromu na kóždym boku horje a zjědu po woběmaj kromomaj z porstom. Nětko zazhibnu małe róžki na tamny bok. Na kóncu tute róžki kruće zlěpju a hotowy je mój papjerjany kłobuk.

Pokiw: Móžeće wotewrjene kóncy tež z tackerom kruće zespinkować, tak zo lěpje dźerža, abo z lěpjatym paskom přilěpić.

Papjerjany kłobuk sami fałdować

Nětko dóstanje kóžde dźěćo nowinsku stronu a spyta z pomocu fałdowanskeje dróhi papjerjany kłobuk sfałdować. Wšitcy so někotre mjeńšiny ćicho a koncentrowani z fałdowanskim nadawkom zaběraja. Po tym dóstanu dźěći barbojtu papjeru a spytaja hišće raz kłobuk fałdować. Nazhonjenja z prěnjeho fałdowanskeho pospyta jim při tym pomhaja a wone móža so mjez sobu podpěrać. Štóž je hotowy, dekorěruje abo pomoluje swój kłobuk z přihotowanymi materialijemi.

Fałdowanski plakat

Zlěpće předzhotowjene fałdowanske kroki na plakat, kotryž na sćěnje přičiniće, tak zo móža sej jednotliwe dźěći pozdźišo tež sami papjerjany kłobuk spaslić.

Spěw spěwać

Dźěći staja sej swój napasleny kłobuk a spěwaja spěw Mój kłobuk ma tři róžki. Prěni króć spěwa so spěw cyle pomału a dźěći činja při spěwanju sćěhowace pohiby:

mój – pokazuja z porstom na sebje

tři – pokazuja tři porsty

nima – třasu z hłowu

kłobuk – pokazuja na kłobuk

róžki – pokazuja na róžki.

Spěwajće spěw wjacore razy z přiběracej spěšnosću, zo by so koncentracija dźěći spěchowała.

Mój kłobuk ma tři róžki

słowa a melodija: z ludu

hornjoserbsce: S. Ć.

Mój kłobuk ma tři róžki,

tři róžki kłobuk ma.

Hdyž nima wón tři róžki,

tón kłobuk njeje mój.